Mahalaga ang abot-kaya at maaasahang kuryente para sa mga pamilya at negosyo. Umaasa ang mga tahanan sa kuryente para sa ilaw, pagluluto, pag-aaral, komunikasyon, at iba pang pang-araw-araw na gawain. Kailangan naman ito ng mga negosyo para makagawa ng mga produkto, makapagbigay ng mga serbisyo, at makalikha ng mas maraming trabaho.

Pero hindi sapat na may kuryente. Kailangan ding abot-kaya ito at maaasahan ang suplay. Kapag mahal ang kuryente, mas nahihirapan ang mga pamilya na bayaran ang kanilang mga bill. Tumataas din ang gastos ng mga negosyo sa produksyon, na kadalasang humahantong sa mas mataas na presyo ng mga produkto at serbisyo para sa mga consumer.

Mas marami nang Pilipino ang may access sa kuryente ngayon, pero marami pa rin ang nahihirapang bayaran ang mataas na singil sa kuryente. Hanggang ngayon, kabilang pa rin ang Pilipinas sa mga bansang may pinakamataas na presyo ng kuryente sa Southeast Asia. Dahil dito, mabigat na gastusin ang kuryente para sa maraming pamilya at negosyo.